ÒTÚÁ MÉJÌ – Apá Kínní – Èdè Yorùbá Rẹwà

Ẹsẹ IFÁ

Apá Kínní ÒTÚÁ MÉJÌ

Wútùwútù yáákí;
Wútùwútù yám̀bèlé,
Ká súré pátápirá,
Ká fẹ̀wù àlàárì fọnkun àmọ́di,
Lékèélékèé, ẹyẹ ìmọ̀le,
Bó bá ṣí lórí ọ̀pọ̀tọ̀,
A bà sórí òrom̀bó,
A máa fi gbogbo ara kéwú eléwú kiri,
A díá fún ọ̀rúnmìlà,
Ifa ń sunkún òun ò rọ́mọ bí.
wọ́n ní ẹbọ ní ó wàá rú
Ó sì rú u.
Wón ní ó réku méjì olúwéré
Kó rẹ́ja méjì abìwẹ̀gbàdà,
Obídìẹ méjì abẹ̀dọ̀ lùkẹ́lùkẹ́,
Ewúrẹ méjì abàmú rẹdẹrẹdẹ,
Ẹinlá méjì tó fìwo ṣòṣùká.
Gbobgo rẹ̀ náà ló rú.
Ìgbà tí Ọ̀rúnmìlà ó kọ̀ọ́ bí,
Ó bí Gánḿbí.
Ìgbà tí ó tùún bí,
Ó bí Kálítù,
Ìgbà tí ó tùún bí,
Ó bí Dáúdù,
Èyí tíí ṣọmọ ìkẹyìin wọn léńje.
Ikú kò pa wọ́n
Àrùn kò ṣe wọ́n,
Ìgbà tí wọ́n dàgbà tán,
Ọ̀rúnmìlà kọ́ wọ́n ní dídá ọwọ́,
Wọ́n mọ̀ ọ́n dá.
Ó́ kọ́ wọ́n létìtẹ̀ alẹ̀,
wọ́n mọ̀ ọ́n tẹ̀.
Ó́ kọ́ wọ́n ní ọ̀karara ẹbọ,
wọ́n mọ̀ ọ́n ha.
Nígbà tó dọjọ́ kan,
Ni wọ́n bá ré agbádá bàbáa wọn,
Wọ́n ré gèlè ìyá wọn;
Wọ́n wọ agbádá náà;
Wọ́n sì wé gèlè náà sórí bàǹtùtù.
Wọ́n na igi mẹ́rin sílẹ̀ níbùúníbùú
Wọ́n wáá kó sí ààrin àwọn igi náà,
Wọ́n ń sẹnu wújẹ́wújẹ́;
Wọ́n ń forí kanlẹ̀,
Wọ́n ń dìde.
Wọ́n ń kúnlẹ̀
Wọ́n sì ń nàró
Bàbáa wọn ṣá ń wò wọ̀n ni.
Wọ́n ń ṣe bẹ́ẹ̀ lẹ́ẹ̀maàrúnmárùún lójoojúmọ́.
Ó wáá rántí Ifá
Tí àwọn awoo rẹ̀ẹ́ kì fún un,
Kò bá wọn jà
kẹ̀ẹ̀kẹ̀ẹ̀ kiní yìí ń wọ̀ wọ́n lára
Ìgbà tó yá,
Wọ́n wáá mú un bí iṣẹ́